Fyrir undirritun samnings

Ef ekki liggur fyrir undirritaður samningur innan 1 árs frá formlegri inntöku í verkefnið, telst umsóknin fallin úr gildi. Sækja þarf skriflega um frestun á gerð skógræktarsamnings innan þess tíma. NLS skulu tilkynna viðkomandi skógarbændum skriflega að umsókn falli úr gildi amk 2 mánuðum fyrir þann tíma.

Norðurlandsskógar skulu tilkynna árlega öllum umsækjendum á biðlista um stöðu umsókna þeirra.

Ef ekki eru hafnar framkvæmdir innan árs frá undirritun samnings skulu NLS rita viðkomandi skógarbónda bréf þar sem honum er gefin eins árs frestur til að hefja framkvæmdir. Ef framkvæmdir eru ekki hafnar innan tveggja ára frá undirritun samnings skal samningnum rift. Sbr 15.gr samnings.

“ Vanefni skógarbóndi skyldur sínar samkvæmt samningi þessum, ber samningsaðilum að leita leiða til úrbóta. Sé um ítrekaðar vanefndir skógarbónda að ræða er Norðurlandsskógum heimilt að rifta samningnum og krefjast endurgreiðslu alls áfallins kostnaðar ásamt verðbótum”.

Miðað er við að framkvæmdatími sé 10 ár og gróðursett sé árlega 10% af áætluðum heildarplöntufjölda. Ef fyrirsjáanlegt er að veruleg frávik verði frá þeirri áætlun af einhverjum orsökum skal skógarbóndi fara formlega fram á endurskoðun á framkvæmdahraða skógræktaráætlunarinnar sbr 14.gr samnings um nytjaskógrækt.
Ef framkvæmdir eitthvert árið verða undir áætlun skal stefnt að því að vinna upp þann mun á næstu árum.
Ef ekki er gróðursett í 2 sumur, er ekki greiddur girðingastyrkur seinna sumarið og ekki fyrr en það ár sem gróðursetning hefst að nýju.