Í kjölfar gildistöku nýrra laga um landshlutaverkefnin í skógrækt, sem samþykkt voru á síðasta ári, hefur verið gert nýtt samningsform um skógrækt.
Helstu breytingar eru þær að í nýju lögunum er ekki gert ráð fyrir endurgreiðslu skógarbænda af afurðum eins og var í eldri lögum og nú eru skýr ákvæði um endurgreiðslu skógræktarframlaga og fyrningu þeirra og ákvæði um þau tilvik þegar skógarbóndi hefur vanefnt samning, skógarbóndi vill segja upp samningi eða skógræktarverkefni vill sjálft losna undan samningi.

Skógræktarsamningar sem gerðir voru með stoð í eldri lögum halda gildi sínu og ákvæði nýju laganna gilda um eldri skógræktarsamninga eftir gildistöku þeirra, eftir því sem við á. Öllum skógarbændum sem eru með eldri samninga er gefinn kostur á að gera nýjan samning í kjölfar gildistöku nýju laganna með þeim lögfylgjum sem þeim fylgja, þ.e. ekki stofnast endurgreiðsluskylda við skógarhögg o.fl.

Bændur sem kjósa að gera ekki nýjan samning eru skuldbundnir af gamla samningnum, og þeim réttindum og skyldum sem af honum leiða.

Þeir skógarbændur sem óska eftir að gera nýjan samning eru beðnir að fylla út eyðublað með ósk um endurnýjun samnings og senda til okkar. Við munum í framhaldinu útbúa nýjan samning og senda til undirritunnar.

Ef eitthvað er óljóst hikið ekki við að hafa samband.