Meðferð frystra skógarplantna

Rótin þiðnar hægar en efri hluti plöntunnar ef hún er sett frosin niður í jarðveginn og nær þá ekki upp vatni. Rótin hefur þá ekki getu til að sjá yfirvextinum fyrir vatni sem leiðir til þess að plantan þornar og drepst. Plöntur sem eru frosnar saman verða fyrir alvarlegum skaða á rótarkerfi ef þær eru barðar eða rifnar í sundur.

Plöntur í kössum á að þíða hægt í skugga. Tími afþíðingar fer eftir því hitastigi sem kassarnir eru í hverju sinni. Við hitastig á bilinu 5° C – 10° C tekur ferlið 3- 4 daga. Sé hitastig hærra þiðna plönturnar á styttri tíma. Aldrei skal láta sól skína beint á kassana til að flýta fyrir þiðnun, við það verður hitastig of hátt í kössunum. Of mikill hiti getur valdið skemmdum í frumum plantna sem hefur neikvæð áhrif á vöxt og lifun eftir gróðursetningu. Mikill hiti eykur líkur á því að grámygla nái sér á strik í plöntunum og valdi skemmdum á plöntuvefnum. Við mikinn hita ganga plöntur fljótar á forða sinn. Hliðarflipar á kössum eru opnaðir til þess að þiðnun gangi fljótar fyrir sig, ef þess er óskað, og það lofti um plönturnar en einnig svo að plöntur njóti lágmarks birtu þegar þær þiðna og lífsstarfssemi þeirra fer í gang. Ekki má rigna á kassa, þeir geta mýkst upp og orðið ómeðfærilegir.

Aðeins má geyma plöntur í viku í kössum eftir að þær eru þiðnar. Lengri geymsla dregur úr þrótti plantnanna. Góð regla er að gróðursetja plöntur sem fyrst eftir þiðnun. Ef gróðursetning dregst og rótarklumpurinn fer að þorna er nauðsynlegt að vökva plönturnar. Einnig ber að hafa í huga að sama regla gildir um plöntur úr kössum og plöntur úr bökkum, þær á að gróðursetja vel vökvaðar. Þá er kassinn opnaður með þar til gerðum rifflipa og vökvað ofan í. Eftir vökvun verður að ganga úr skugga um að plöntur standi ekki í vatnspolli og að drena kassana ef svo er. Við vökvun í kassana má búast við að þeir linist upp með tímanum og verði ómeðfærilegri og því meiri ástæða til að gróðursetja plöntur sem fyrst eftir þiðnun. Ef kassar hafa linast eftir vökvun og ekki er hægt að nota kassabelti (1. mynd) má færa plöntur úr kössum yfir í pokabelti (2. mynd) og nota þau við gróðursetninguna.

Dæmi um kassabelti

Ef búið er að opna kassa þegar þeir eru fluttir á gróðursetningarstað verður að skýla plöntunum fyrir sól og vindi.

Dæmi um pokabelti

Plöntur þurfa vissan lágmarkstíma fyrir eðlilegan vöxt og vetrarfrágang. Verði þessi tími of stuttur hafa plönturnar ekki tækifæri á að fara í gegnum alla þá ferla sem nauðsynlegir eru til að byggja upp frostþol fyrir veturinn og hætt er við að þær þoli ekki haust- og vertarhörkur.