Eldri fréttir

Sögun á timbri úr skógi á Dagverðareyri (22. 1. 2009)

Undanfarna daga hafa starfsmenn Norðurlandsskóga unnið við að saga timbur sem féll til við grisjun í skóginum á Dagverðareyri. Oddur Gunnarsson bóndi, sem lést í lok síðasta árs var mikill skógræktaráhugamaður og hafði ætlað sér að saga og nýta timbrið sem kemur úr eldri hluta skógarins en þar hófst gróðursetning árið 1950. Fjölskylda Odds ætlar sér að halda áfram skógræktarstarfinu og stefna þau að því að smíða sólpall úr timbrinu.

Mikil aukning er nú á eftirspurn eftir timbri úr íslenskum skógum. Veikt gengi íslensku krónunnar og hár flutningskostnaður hefur orðið til þess að innflutningur á óunnu timbri hefur hækkað mikið undanfarið. Nú er svo komið að íslenskir skógar eru allt of ungir og umfangslitlir til að anna þeirri eftirspurn sem nú er orðin

Hæsta tréð (16.1.2009)

Eitt það skemmtilegasta sem skógræktarfólk veit er að spá í hæð trjáa, í hvaða landshluta hæsta té landsins vex og hvað tré af öllum mögulegum og ómögulegum tegundum eru há. Síðan geta menn rifist um hvort eitthvað sé að marka mælingarnar, hvort notaðar hafi verið öruggar aðferðir við mælinguna eða hvort jákvæð mismunun hafi hækkað tréð umtalsvert. Svo vita menn yfirleitt um eitt eða fleiri tré fjarri alfarleið sem á eftir að mæla og eru örugglega mun hærri en þau tré sem þegar hafa verið mæld.

Nú síðustu misseri hafa starfsmenn hjá Skógrækt ríkisins verið að mæla tré um land allt. Á Akureyri hefur Rúnar Ísleifsson mælt nokkur gríðarlega há tré. Þar á meðal er alaskaösp sem stendur framan við Aðalstræti 68 og mælist það nú 21,13 metra hátt. Það góða við þetta tré er að það hefur verið mælt tvisvar áður. Út frá þessum mælingum er hægt að sjá að tréð hefur að meðaltali hækkað um 35 cm á ári. Ef við svo gefum okkur að veðurfar sé alltaf eins og tréð vaxi alltaf á sama hraða er hægt að reikna hæð trésins bæði afturá bak og áfram. Þá verður tréð orði 25 metra hátt eftir 11 ár eða árið 2019. 30 metra hátt verður það svo 2035 og 50 metra hátt 2091(Sjá mynd). Nú verðum við bara að vona að það komi ekki einhver brjálæðingur með keðjusög og felli tréð. (BÞ)

Skjólbeltaúttekt (7.1.2009)
Síðastliðið sumar gerði Norðurlandsskógaverkefnið úttekt á öllum skjólbeltum ræktuðum frá upphafi verkefnisins eða frá árinu 2000 til 2007. Heimsóttir voru 134 bæir í fimm sýslum. Heildarlengd skjólbelta á svæði Norðurlandsskóga miðað við einfalda röð er 247 km. Ástandsmat var gert á 468 skjólbeltum á starfssvæði NLS. Myndin hér fyrir neðan sýnir skiptingu þessarra 247 km milli ástandsflokka. Um 188,8 km fá fyrstu einkunn og 21,9 km fá aðra. Rúmlega 27 km frá 3. einkunn og 8,8 km teljast vera ónýtir. Þar sem 1. og 2. ástandsflokkur gefa til kynna að belti séu í lagi má segja að um 211 km af 247 séu í góðu ástandi eða 85 % af heildarlengd skjólbelta sem hlýtur að teljast mjög viðunnandi niðurstaða. Verið er að vinna að skýrslu um úttektina sem verður birt í heild hér á heimasíðunni (RJJ).
Alaskaaspir verða að timbri (27.11.2008)
Í rokinu mikla sem gekk yfir um miðjan september féllu tvær stórar aspir í garðinum bak við skrifstofuhúsið í Gömlu gróðrarstöðinni (Eins og sjá má í “mynd viku”). Ákveðið var að reyna að búa til verðmæti úr öllum þeim við sem þarna féll til frekar en að láta aspirnar grotna niður. Brynjar hefur verið að saga af öspunum greinar sem hann notar í eldivið til að kynda húsið sitt (Eins og sjá má í eldri fréttum). En sjálfa bolina var ákveðið af fletta og nota timbrið í ýmis konar smíðar. Notuð var flettisögin sem Norðurlandsskógar og Skógræktarfélag Eyfirðinga keypti í sameiningu síðastliðin vetur ( Eins og sjá má í eldri fréttum!) Vel gekk að fletta bolunum og myndaðist fljótlega hár stafli að sverum plönkum sem ætlunin er að smíða úr borð og bekki (BÞ).
Úttekt á lifun sumarið 2008 (4.11.2008)
Í sumar var gerð úttekt á lifun plantna sem voru gróðursettar árið 2007. Við val á mæliflötum var notuð sú aðferð að leggja mælinet með 500x 500m möskvastærð yfir Norðurland og þar sem línur í netinu skárust og undir var gróðursetning frá árinu 2007 var gerð mæling. Mælingin fór þannig fram að allar lifandi plöntur í 100m2 hringfleti voru taldar. Einnig voru allar dauðar plöntur taldar og útfrá afstöðu lifandi plantna var reynt að meta hvort einhverjar plöntur væru dauðar og horfnar. Út frá þessum talningum var svo hægt að reikna út upphafsþéttleika gróðursetninganna og sjá núverandi þéttleika og reikna svo afföllin út frá því.
Alls var farið í 24 mælifleti og af þeim voru 21 sem lentu í gróðursettum svæðum. Lifunin í mæliflötunum reyndist vera 86 % ± 7% miðað við 95% öryggismörk. Þéttleiki við gróðursetningu er 3000 plöntur/ha ± 400 plöntur miðaða við 95 % öryggismörk. Þessi niðurstaða verður að teljast vel viðunandi bæði hvað varðar lifun svo og þéttleiki gróðursetninga.
Hreinsunarstarfi lokið í Ásbyrgi (28.10.2008)
Lokið hefur verið við að hreinsa skóginn í Ásbyrgi eftir stormfallið sem varð þar í leifum af fellibylnum Ike. Starfsmenn skógræktar ríkisins unnu það verk og hafa keyrt viðinn úr byrginu. Áætlað er að þetta hafi verið um 30 rúmmetrar og talið að um 700 tré hafi fallið í reitnum.
Unnið að hreinsun í lerkilundinum. Mynd: Sigurður Skúlason	Timbrið komið á leiðarenda eða inn í Vaglaskóg. Mynd: Sigurður Skúlason
Að sjálfsögðu stefnir Skógræktin að því að nýta viðinn sem allra best og vinna úr honum meðal annars borðvið, eldivið, staura og trjákurl.
Miklar skógarskemmdir í Ásbyrgi (1.10.2008)
Miklar skemmdir urðu á lerkilundinum innst í Ásbyrgi í hvassviðrinu aðfaranótt 17.september. Þessi lerkilundur var sá stórvaxnasti og fallegasti í allri Norður-Þingeyjarsýslu og var hann gróðursettur 1951-1958 og er því orðinn vel rúmlega hálfrar aldar gamall. Er þetta mikill skaði eins og meðfylgjandi myndir sýna og sorglegt að sjá hvernig getur farið fyrir trjárisunum. Lerkið er af kvæmunum Hakaskoja, Raivola og Altai, en það er einmitt Raivola-lerki sem er í Guttormslundi í Hallormsstaðaskógi. Mikið af trjám hefur rifnað upp með rótum eða kubbast í sundur. Er ljóst að mikið hreinsunarstarf er framundan.
Mynd: Helga Árnadóttir, Vatnajökulsþjóðgarði
Vorgróðursetning nálgast (25.4.2007)

Þeir skógarbændur sem ekki hafa komið skilaboðum til sinna svæðisstjóra varðandi plöntuóskir til vorgróðursetningar eru beðnir um að gera það hið fyrsta.

Þeir sem hafa áhuga á að hefja áburðargjöf fljótlega hafi samband til að fá úthlutað áburði af birgðum fyrra árs. Áburður er til á dreifingarstöðvunum á Vöglum, í Kjarna og á Krithóli. Við munum koma áburði til þeirra sem ekki tilheyra þessum dreifingarstöðvum, en þeir eru þá beðnir um að hafa samband við sinn svæðisstjóra.

Fljótlega eftir mánaðarmót förum við að deila niður plöntum milli bæja og þá mikilvægt að hafa allar upplýsingar þannig að bændur fái þær plöntur sem þeir óska eftir.

Viðbrögð við auglýsingu Norðurlandsskóga um námskeið í skógrækt og skjólbeltarækt sem fyrirhuguð eru í apríl hafa verið ótrúlega góð en nú hafa um 130 manns skráð sig á námskeiðin. Þetta sýnir að áhuginn fyrir skógrækt hefur sjaldan verið meiri en nú og þörfin á námskeiðahaldi á Norðurlandi hefur greinilega verið mikil.
Reiknað er með að haldin verði átta námskeið á starfssvæðinu, fyrsta námskeiðið verður strax eftir páska.
Þeir sem hafa skráð sig fá bréf á næstu dögum þar sem fram koma nánari upplýsingar.

Skoðuð hafa verið kortlagningargögn Norðurlandsskóga með tilliti til gróðurfars. Kemur þar ýmislegt athyglisvert í ljós. Mólendi er langstærsti flokkurinn en tæplega 60% nýskógræktarlands fellur í þann flokk. Af einstökum gróðurhverfum er mest af lyngheiði, eða 24% heildarinnar, í öðru sæti er hrísheiði með tæplega 15% og þriðja er Þursaskeggs-móasefsmór með tæp 14%.

Graslendi er rúmlega 20% svæðisins. Á rúmlega helmingi graslendisins eru grös algjörlega ríkjandi en tæplega helmingur graslendis er annaðhvort smárunnagraslendi eða graslendi með þursaskeggi.

Mýrar eru tæplega 10% samninsbundins lands og má segja að með því séu þær nánast friðaðar því það er stefna Norðurlandsskóga að ræsa ekki fram mýrar til skógræktar. Þeim er því yfirleitt sleppt, eða gróðursett einungis í jaðra.