Fréttir - eldra efni

Fréttir

Á döfinni

: taxtar

Eldri fréttir

Eldri fréttir 2005

Metár í gróðursetningu á Norðurlandi 29.11.2005

Met var sett í gróðursetningu á Norðurlandi í ár. Á vegum Norðurlandsskóga voru gróðursettar tæplega 1,4 miljónir plantna sem er talsverð aukning frá því í fyrra en þá voru gróðursettar ríflega 1,1, miljónir plantna. Gróðursett var á 100 jörðum en alls eru nú 120 jarðir með þinglýsta skógræktarsamninga um alls tæplega 6.500 hektara. Skjólbelti voru ræktuð á 47 jörðum alls um 56 km. sé miðað við einfalda röð.

Skógarbændur frá Vestfjörðum í heimsókn

Um síðast liðna helgi komu þátttakendur í Grænni skógum á Vestfjörðum í heimsókn á Norðurland. Starfsfólk Norðurlandsskóga tók að sér að halda námskeið fyrir hópinn um framleiðslu skógarplantna. Fyrirlestrar voru haldnir í höfuðstöðvum Norðurlandsskóga í Gömlu gróðrarstöðinni, á föstudag og laugardagsmorgun. Seinnipart laugardags var síðan farið í heimsókn í Gróðrarstöðina í Kjarna þar sem Jón Kr. Arnarsson tók á móti hópnum og sýndi ræktunarstöðina og útskýrði ræktunarferlið. Námskeiðinu lauk síðan með ferð að Vöglum þar sem Skógrækt ríkisins rekur m.a. fræframleiðslu í gróðurhúsi. Yfir 30 þátttakendur eru í Grænni skógum á Vestfjörðum og var mætingin á námskeiðið 100% þrátt fyrir að langan veg væri að fara og sýnir það áhuga þeirra Vestfirðinga á verkefninu. (V.J 12.10.2005)

Haustgróðursetningu að ljúka 06.10.2005

Haustgróðursetningu er nú um það bil lokið. Tíðin í september hefur verið heldur leiðinleg fyrir gróðursetningafólk en nokkuð hagstæð plöntum þar sem raki hefur verið nægur og rúmlega það.

Alls voru gróðursettar um hálf miljón plantna í haust og verður því heildargróðursetning ársins um 1.3 miljónir plantna sem er nýtt met á Norðurlandi.

Bændur eru hvattir til að skila framkvæmdaskráningum sem fyrst þannig að hægt verði að hefja vinnu við uppgjör.

Guðríður og Johan í leyfi

Guðríður og Johan eru bæði í fæðingarorlofi þessa dagana, Gugga kemur til baka eftir ár en Johan verður í fríi í mánuð núna og svo aftur í hálfu starfi í janúar og febrúar

Uppgjör vegna vorgróðursetninga

Byrjað verður að vinna í uppgjöri vegna vorgróðursetningar og annara framkvæmda 10. júlí. Þeir skógarbændur sem ekki hafa skilað framkvæmdaskráningum fyrir þann tíma fá ekki sitt uppgjör fyrr en með haustuppgjörinu í byrjun desember.
Vinsamlegast virðið þennan skilafrest.

Skógarbændur eru minntir á að skila bökkum á dreifingastöðvar. Ef einhverjir eru með bakka frá gamalli tíð eru þeir beðnir að skila þeim sem fyrst á næstu dreifingastöð. (20.6.2005)

18 skógarbændur á Norðurlandi útskrifaðir úr grænni skógum. (Fréttatilkynning frá LBH)

Laugardaginn 11. júní útskrifuðustu 18 skógarbændur á Norðurlandi úr Grænni skógum, sem er skógræktarnám á vegum Starfs- og endurmenntunardeildar Landbúnaðarháskóla Íslands. Bændurnir hafa verið í náminu í þrjú ár og er nám þeirra metið til 16 eininga á framhaldsskólastigi. Þeir eiga það allir sameiginlegt að vera í Norðurlandsskógum en starfsfólk Norðurlandsskóga kom mikið að kennslunni ásamt öðrum sérfræðingum á sviði skógræktar- og landgræðslu í landinu. Í dag eru um 120 bændur í Grænni skógum víða um land en Landbúnaðarháskólinn sér um framkvæmd námsins en þeir aðilar sem koma að náminu auk skólans eru Skógrækt ríkisins, Landgræðsla ríkisins, landshlutabundnu skógræktarverkefnin og Félög skógarbænda í viðkomandi landsfjórðungi. Allir nemendur í Grænni skógum hafa það að markmiði að rækta skóg á jörðum sínum og vilja leggja enn frekari áherslu á það með því að setjast á skólabekk og fræðast um hina ýmsu þætti skógaræktar. Í náminu er m.a. fjallað um val á trjátegundum, skógarhönnun og landnýtingaráætlanir, undirbúning lands fyrir skógrækt, framleiðslu og gróðursetningu skógarplantna, skógarumhirðu, skógarnytjar, sjúkdóma og skaða í skógi, skjólbelti, skógarhöggsækni og verndun fornminja og náttúru í skógrækt svo eitthvað sé nefnt. Þá er vikuferð til útlanda hluti af náminu þar sem þátttakendur kynnast því helsta sem nágrannaþjóðir okkar eru að gera í skógrækt. Í náminu er mikil áhersla lögð á vettvangsferðir þar sem þátttakendur fara út í skóg og fá þannig meiri og betri tilfinningu fyrir því sem verið er að fjalla um hverju sinni. Skógarbændur á Vesturlandi munu bætast í hóp þeirra, sem gefst kostur á að stunda nám í Grænni skógum síðar í sumar þegar skrifað verður undir samstarfssamning við Vesturlandsskóga um verkefnið. Þá má geta þess að nú er unnið að námsbók fyrir Grænni skóga, sem kemur út í haust. Meðfylgjandi mynd var tekin af útskriftarhópi Grænni skóga á Norðurlandi á laugardaginn, ásamt forsvarsmönnum Norðurlandsskóga og Landbúnaðarháskólans en útskriftin fór fram á Hofi í Vatnsdal í Austur Húnavatnssýslu. (21.6.2005)

Sumarstarfsmenn hjá Norðurlandsskógum

Tveir sumarstarfsmenn verða hjá Norðurlandsskógum í sumar. Hildur Stefánsdóttir í Laxárdal í Þistilfirði verður við störf í júní og júlí. Hún mun m.a. annast úttektir á gróðursetningum í N-Þing ásamt því að skrásetja og meta árangur skjólbelta- og skógræktar á svæðinu. Selfyssingurinn Páll Sigurðsson skógfræðinemi mun vinna við endurkortlagningu á elstu skógræktarsvæðunum í júlí og ágúst. Tilgangurinn með þeirri vinnu er fyrst og fremst að meta árangur og þörf á grisjun og íbótum í reiti þar sem gróðursetningar eru of gisnar. (20.6.2005)

Gróðursetningar að hefjast (26.5.2005)

Starfsmenn Norðurlandsskóga hafa fyllst bjartsýni við það að hitinn er nú farin að nálgast 10 gráður og útlit fyrir hægt hlýnandi veður. Byrjað verður að keyra út plöntur á dreifingastöðvar í dag (fimmtudag 26/5) fyrsta sendingin kemur í Kjarna og ef allt gengur vel verða komnar plöntur á allar dreifingastöðvar um miðja næstu viku.
Bændur eru minntir á að hringja á undan sér á dreifingastöðvar til að tryggt sé að afgreiðsla gangi fljótt og vel fyrir sig. Ekki er víst að allar tegundir komi í fyrstu ferðunum þannig að það borgar sig að hringja og kanna ástandið til að menn fari ekki fýluferð. Áburður er einnig afhentur á dreifingastöðvum.
Tengiliðir á dreifingastöðvum eru eftirfarandi:

Dreifingastöð	Opnunartími	Tengiliður	Símar
Kjarni	Virka daga 8-18	Ólöf	462-4047 eða 698-1503
Krithóll	Virka daga 16-18	Anna	893-2615
Hólabak	Virka daga 15:30-17:30	Aðalheiður	452-4473
Vaglir	Virka daga 14-16	Guðrún	462-5175
Sandfellshagi	Eftir samkomul.	Gunnar	822-6108

Ársskýrsla Norðurlandsskóga 2004 komin út

Ársskýrsla Norðurlandsskóga 2004 er komin út, þeir sem hafa áhuga á að fá eintak af henni hafi samband við Norðurlandsskóga í síma 461 5640 eða nls@nls.is .

(12.5.2005)

Efnisyfirlit

Samantekt
Tíðarfar og vöxtur
Stjórn og starfsmenn
Samningar
Námskeið og kynning
Áhöld og tæki
Plöntukaup
Fjármál
Rannsóknarstarf
Gróðursetningartilraun
Asparverkefni
Smittilraun á gráelri
Kvæmatilraun með skógarfuru
Kvæmatilraun með rauðgreni
Framleiðsla vorunga af birki og lerki til sumargróðursetningar
Framkvæmdir – heildaryfirlit
Skógrækt
Skjólbelti
Húnavatnssýslur – Samantekt
Skagafjarðarsýsla – Samantekt
Eyjafjarðarsýsla – Samantekt
Þingeyjarsýslur – Samantekt
Norðurlandsskógar 5 ára
Fundargerðir stjórnar Norðurlandsskóga 2004

Skógrækt - í sátt við umhverfið

Ný vefsíða var opnuð í gær, 18 apríl, af landbúnaðarráðherra og umhverfisráðherra, nefnist hún "skógrækt - í sátt við umhverfið". Efnið á síðunni er niðurstaða starfshóps sem skipaður var til að vinna að gerð leiðbeininga varðandi skipulag skógræktar í sátt við umhverfið. Starfshópurinn var skipaður fulltrúum Skógræktar ríkisins, landshlutabundinna skógræktarverkefna, Skógræktarfélags Íslands, Umhverfisstofnunar, Náttúrufræðistofnunar Íslands, Fuglaverndar, Landverndar og Fornleifaverndar ríkisins. (19.4.2005)

Vantar verktaka í gróðursetningu

Nokkrir skógarbændur hafa leitað til Norðurlandsskóga og spurst fyrir um fólk sem gæti tekið að sér gróðursetningar í sumar.

Í lögum um landshlutabundin skógræktarverkefni er ákvæði þess efnis að skógarbændur hafi forgang að slíkri verktöku hjá öðrum skógarbændum, ef framboð vinnuafls sé það mikið að um störfin sé slegist, en sú virðist ekki vera raunin nú.

Norðurlandsskógar hvetja þess vegna þá sem hafa áhuga á að taka að sér gróðursetningu fyrir skógarbændur í sumar að hafa samband í síma 461 5640 eða með tölvupósti á nls@nls.is. Við munum þá veita nánari upplýsingar og benda þeim skógarbændum sem til okkar leita á ykkur. Nauðsynlegt er að hafa reynslu af gróðursetningu og skyldum störfum.

Í framtíðinni verður safnað saman hér á heimasíðuna upplýsingum um þá sem taka að sér verk fyrir skógarbændur og hvaða þjónustu þeir veita. (21.3.2005)

Tímamælingar við gisjun í gangi

Á komandi árum verður grisjun og umhirða skógar stór þáttur hjá bændum í Norðurlandsskógaverkefninu. Búast má við að eftir 5-10 ár þurfi að fara yfir þau svæði sem fyrst var gróðursett í og framkvæma fyrstu grisjun sem felst aðallega í “bilun” það er að segja, bilið milli trjánna er jafnað með því að saga burtu slökustu einstaklinganna til að rýma fyrir þeim sem vænlegri eru. Þegar þessi vinna verður komin í hámark hjá Norðurlandsskógum má búast við að fara þurfi í gegn um allt að 200 hektara árlega.

Johan Holst starfsmaður Norðurlandsskóga hefur notað undanfarna blíðviðrisdaga til að gera tímamælingar við grisjun með kjarrsög. Tilgangurinn er að átta sig á kostnaði við fyrstu grisun. Kjarrsögina er hægt að nota þar til bolir trjánna hafa náð þvermáli sem er meira en 12-15 cm. Eftir það verður að nota keðjusög en sú vinna er mun seinlegri og þar af leiðandi dýrari. (3.3.2005)

Kynning á sérstöku svæðisskipulagi fyrir Norðurlandsskóga

Norðurlandsskógar, Skógrækt ríkisins og Skipulagsstofnun boða til kynningarfunda um tillögu að Sérstöku svæðisskipulagi um skógrækt á starfssvæði Norðurlandsskóga frá Langanesi að Hrútafirði. Tillagan er í samræmi við 15. gr. skipulags og byggingarlaga.
Búnir eru fundir á Húsavík og í Varmahlíð en á morgun verður fundur í Gömlu Gróðrarstöðinni við Eyjafjarðarbraut, Akureyri, kl.10:00 – 12:00.
Fundurinn er öllum opinn. Áríðandi er að sem flestir fulltrúar í sveitarstjórnum og hagsmunaaðilar sjái sér fært að mæta á fundinn.

Allar nánari upplýsingar veita undirrituð:

Brynjar Skúlason, Norðurlandsskógum sími 461-5642: brynjar@nls.is

Hallgrímur Indriðason, Skógrækt ríkisins sími 461 5644:hallgrimur@skogur.is

Matthildur Elmarsdóttir, Skipulagsstofnun simi 595-4100:matthildur@skipulag.is

Framkvæmdaóskir sumarsins

Við erum byrjuð að velta fyrir okkur framkvæmdum sumarsins og förum fljótlega að skipta niður plöntum á milli jarða. Þeir sem ekki hafa komið skilaboðum til sinna svæðisstjóra um óskir fyrir sumarið eru beðnir að gera svo hið fyrsta.(28.2.2005)

Umsóknafrestur um skjólbelti

Þeir skógarbændur sem ætla sér að leggja skjólbelti þurfa að láta vita fyrir 15. apríl. Þeir sem taka við sér eftir þann tíma þurfa að bíða fram á næsta ár. Þetta er nauðsynlegt þar sem við þurfum að panta plast og skipta niður plöntum. Við erum að endurmeta reglur varðandi skjólbeltaframlögin og munum miða við að ekki verði lagðir minna en 500 metrar á hverjum bæ. Þetta er einkum vegna þess hversu mikill kostnaður fylgir plastlagningunni og allri umsýslu ef mjög stutt belti eru víða. Undantekningar verða þó gerðar á þessum reglum á þeim svæðum sem skilyrði eru erfiðust og lítil reynsla komin á ræktun. (28.2.2005)

5 ára afmæli Norðurlandsskóga

Stjórn Norðurlandsskóga hélt í dag 33. fund sinn, en á þessum degi eru 5 ár liðin frá því að fyrsti stjórnarfundur verkefnisins var haldinn.
Á þessum afmælisfundi voru m.a. teknar inn 11 nýjar jarðir í verkefnið og stefnt er að því að taka inn annan eins fjölda fyrir vorið. Þannig tekst á þessu ári að útrýma biðlistanum sem verið hefur um inngöngu í verkefnið frá upphafi.
Á þessu ári er stefnt að því að gróðursetja um 1,5 miljónir plantna og væntanlega verður fjöldi jarða með skógræktarsamninga orðin um 130 í árslok.

Frá upphafi hafa verið gróðursettar 3.754.558 plöntur, þar af 3.572.888 skógarplöntur og 181.670 skjólbeltaplöntur. (8.2.2005)

Norðurlandsskógar flytja

Norðurlandsskógar hafa flutt skrifstofuaðstöðu sína úr Búgarði, Óseyri 2 í Gömlu gróðrarstöðina sem er nær 100 ára gamalt hús í innbæ Akureyrar. Norðurlandsskógar munu hafa aðstöðu í húsinu ásamt starfsmönnum Skógræktar ríkisins á Norðurlandi.
Gamla gróðrarstöðin er sögufrægt hús og ekki síður garðurinn sem er í brekkunni ofan við húsið

Um Gömlu gróðrarstöðina

Í bókinni Ásýnd Eyjafjarðar segir eftirfarandi um sögu gömlu gróðrarstöðvarinnar:
Ræktunarfélag Norðurlands sem var stofnað 1903 fékk sama ár að gjöf 25 dagsláttur (8 ha) frá Akureyrarkaupstað. Trjárækt var strax hafin neðan við brekkuna og í Naustagili. Árið 1906 var reist íbúðarhús fyrir tilraunastjórann sem síðar var mikið endurbætt. Húsið og hinn mikli trjágarður umhverfis það hefur síðan verið nefnd Gróðrarstöðin. Þar fóru lengi fram merkar tilraunir í landbúnaði, fyrst á vegum Ræktunarfélagsins en frá 1947 á vegum ríkisins uns starfsemin var flutt 1974 að Möðruvöllum í Hörgárdal. Framan af önnuðust framkvæmdastjórar Ræktunarfélagsins trjáræktina í Gróðrarstöðinni, en á árunum 1915-1923 annaðist Guðrún Þ. Björnsdóttir garðinn og Jóna M. Jónsdóttir frá Sökku í Svarfaðardal á árunum 1924-1946, að tveimur árum undanskildum er Svava Skaptadóttir gengdi starfinu. Það var mikið lán að þessar konur sinntu gróðrinum af natni, þannig að Gróðrarstöðin varð víðfræg fyiri fegurð og grósku. Þær skrifuðu merkar skýrslur um vöxt og þrif trjánna á hverju ári í Ársrit Ræktunarfélags Norðurlands og gerðu einnig árlegar mælingar á trjávexti.
Í brekkunni sunnan við Naustagilið lét Sigurður Sigurðsson gróðursetja ýmsar tegundir af trjáplöntum á árunum 1908-1909. “Tilgangurinn var að fá úr því skorið, hvort trjáplöntur gætu vaxið og dafnað sæmilega í óvöldu landi án nokkurrar umhirðu, fyrr en að því kæmi að þyrfti að grisja” skrifar Ármann Dalmannsson 1955. Sigurður Blöndal Fyrrverandi skógræktarstjóri skrifar 1990: “ Þessi skógarteigur (sem óx upp af gróðursetningunni 1908-1909) er einn hinn merkasti á Íslandi frá skógræktarsögulegu sjónarmiði”

Ljóst er að ákjósanlegri umgjörð fyrir skógræktarstarfsemi verður vandfundinn og er það von okkar að með tímanum takist að festa þennan sögufræga stað í sessi sem miðstöð skógræktar á Norðurlandi enn á ný. (8.2.2005)

Endurbætt heimasíða opnuð

Ný og endurbætt heimasíða NLS var opnuð 8. febrúar. Guðríður Baldvinsdóttir svæðisstjóri í Þingeyjarsýslu smíðaði vefinn og er tekin við vefumsjón af Johanni Holst. Allar ábendingar og tillögur að efni á vefinn eru vel þegnar. (8.2..2005)