Vetur (05.03.2010)

Veturinn hefur verið óvenju kaldur á Norðurlandi, mikið frost og snjór með mesta móti á Eyjafjarðarsvæðinu. 

Á dögunum sást til Krossnefs í Reykjarhólsskógi í Skagafirði, á ferðinni voru tveir karlfuglar sem létu heldur ófriðlega og bendir það til þess að tilhugalífið sé í gangi, en Krossnefurinn getur orpið um miðjan vetur.

Krossnefur er einn af nýju skógarfuglunum sem hafa komið til landsins í kjölfar aukinnar skógræktar. Fuglinn er talinn einn algengasti flækingsfuglinn hérlendis. Krossnefurinn er sérkennilegur að því leyti að goggurinn á honum víxlast í kross eins og nafn tegundarinnar ber með sér, en þetta er aðlögun að fæðuvali fuglsins sem er fræ barrköngla, en krossnefið gerir fuglinum auðveldara að ná fræjunum úr könglunum.

Í ársriti Skógræktarfélags Íslands 2009 skrifar Daníel Bergmann grein um Krossnef, þar segir m.a. frá því að Hrafn Óskarsson starfsmaður Skógræktar ríkisins hafi fundið hreiður með ungum í byrjun desember árið 1994. Þessi skringilega tímasetning á varpi er víst alls ekki svo óalgeng því í heimkynnum sínum verpir Krossnefurinn alla mánuði ársins, þar ræður fæðuframboðið mestu og ef lítið framboð er af fæðu flækjast þeir þangað þar sem framboðið er meira. Eins og áður sagði er Krossnefurinn auðþekktur á nefinu, karlfuglinn er áberandi rauðgulur en kvenfuglinn grængulur.

Með aukinni skógrækt má búst við að Krossnefurinn og aðrir skógarfuglar verði enn algengari í íslenskum skógum og er það fagnaðarefni fyrir alla náttúruunnendur.

21.desember 2008

Jólatré sótt í íslenskan skóg

Sá siður er heldur að færast í aukana að Íslendingar fari út í skóg og höggvi sitt eigið jólatré, hvort sem það er í eigin skógi eða skógi í eigu skógrækarfélaga eða annarra stofnana.

17.nóvember 2008

Fallinn risi

Brynjar stendur við fallna ösp aftan við skrifstofuhúsnæði Norðurlandsskóga, Gömlu gróðrarstöðina. Á myndinni sést neðan í rótarhnyðjuna sem rifnaði upp.

Öspin féll í veðrinu sem gerði 17. september. Hún var um fimmtugt, orðin um 20 m á hæð og umfang krónunnar að sama skapi mikið eða um 8 m, slík tré taka á sig ansi mikinn vind þegar þau eru fulllaufguð og ekki að undra að eitthvað þurfi undan að láta.(RJ)

4.nóvember 2008

Skógarmannakaffi

Þátttakendur í Grænni skógum voru á Dagverðareyri og Glæsibæ að læra um skógarumhirðu. Að hætti skógarmanna var auðvitað kveikt upp, hitað ketilkaffi og grillaðar pylsur.(BS)

23.september 2008

Góður vöxtur í ösp í Húnavatnssýslu

Á Hólabaki í Austur Húnavatnssýslu ræktar Aðalheiður Ingvarsdóttir skjólbelti í samstarfi við Norðurlandsskóga.
Árangurinn hefur verið framar vonum og hér sést Aðalheiður standa við alaskaösp sem hún gróðursetti í skjólbelti vorið 2004. (RJJ)

29.ágúst 2008

Allir hjálpa til

Þegar komið er að gróðursetningu þurfa allir að hjálpast að og nota bestu fáanleg tæki til verksins. Johan Pétur, sem fylgst hefur með tækniframförum í skógrækt í Svíþjóð, lagði sitt að mörkum til að gróðursetning á Stóra-Grindli í Fljótum gengi fljótt og vel fyrir sig (BÞ).

29.júlí 2008

Glæsileg ösp í Kelduhverfi

Þessi glæsilega alaskaösp var gróðursett í skjólbelti við Undirvegg í Kelduhverfi sumarið 2006. Eins og sjá má hefur hún farið afskaplega vel af stað og er hefur náð húsráðendum í höfuðhæð og gott betur (GB).

1.júlí 2008

Blágreni í Núpasveit

Stunduð er skógrækt á nokkrum bæjum í Núpasveit í N-Þing. Í skógræktinni á Brekku er m.a. þetta vöxtulega blágrenitré. Það var þó að vísu gróðursett nokkrum árum fyrir stofnun Norðurlandsskóga en ef vel er rýnt í myndina má sjá að það hefur tvöfaldað hæð sína á síðastliðnum þremur árum.

Fyrir þá sem ekki þekkja staðhætti, þá er Núpasveit norðan Öxarnúps, Kópasker er í Núpasveit.

19.júní 2008

Nýr skógarmaður!

30.apríl 2008

Ekki alltaf jólin....

Það eru ekki alltaf jólin í skógræktinni frekar en annarri ræktun. Nú þegar farið er að "vora", allavega samkvæmt dagatalinu, streyma sumargestirnir til landsins í formi farfugla. Þeir eru misvinveittir skógræktinni og getur blessuð grágæsin verið töluverður skaðvaldur í skógræktinnni. Myndin hér að ofan var tekin að hausti og sýnir hvernig gæsin af skömmum sínum getur farið um, þegar hún er í berjamó, og brotið, slitið upp og nagað í sundur ungar trjáplöntur. Því miður halda engar girðingar þessum fljúgandi skaðvöldum. (GB)

25.mars 2008

Skógarbirnir

Það kemur sennilega seint til þess að slík skilti verði nauðsynleg á tjaldstæðum í íslenskum skógum. Þau eru algeng í Alaska þar sem dýralíf skóga er mun fjölbreyttara en hér.

Á skiltinu, sem var rækilega skrúfað fast á nestisborð á ónefndu tjaldstæði, er dvalargestum stranglega bannað að skilja eftir utandyra, hvort sem er að degi eða nóttu, í tjaldi eða tjaldvagni; kælibox, rusl eða ruslapoka, drykkjarílát, niðursuðudósir, flöskur, eldhúsáhöld, borðbúnað, grill, mat, snyrtivörur, gæludýramat eða dalla, þvottabala eða nokkuð það sem gæti verið matarlykt af nema rétt á meðan að verið er að nota það. Þegar ofantalin áhöld eru ekki í notkun skal geyma þau í bíl, húsbíl eða sérstökum geymslum á tjaldstæðinu. Við brotum er sektað um 50 $ og viðkomandi áhöld gerð upptæk.

Þetta er gert til að tryggja framtíð bjarnanna og öryggi notenda tjaldstæða.......(GB)

26.febrúar 2008

Hæruölur

Þessi hæruölur er upprunninn úr fræsöfnunarferð þeirra Brynjólfs Jónssonar og Óla Vals Hanssonar sem farin var til Kamtsjatka árið 1993. Fræ af nokkrum tegundum úr þeirri ferð bárust í Gróðrarstöðina í Kjarna þar sem plöntur voru aldar upp í fjölpottabökkum. Árið 1996 voru gróðursettir í Vaðlareit nokkrir tilraunareitir af Hæruelri, Hrísöl (Alnus fruticosa) og Steinbjörk (Betula ermanii)

Hæruölurinn er eina tegundin sem hefur náð að vaxa og dafna og er einstaklingurinn á myndunum sérlega glæsilegur og hefur vaxið gríðarlega undanfarin ár eins og sjá má. Hvort hann verður 15 metrar eins hann getur orðið í heimkynnum sínum á eftir að koma í ljós. Báðar myndirnar eru teknar í febrúar, sú efri 2005, en sú neðri2008 (V.J)

13.febrúar 2008

Rauðgreni

Rauðgreni vex vel þar sem komið er skjól og jarðvegur er frjósamur, t.d. í skjóli lerkis í frjóu mólendi. Rauðgreni þolir snjóþyngsli sæmilega og hentar vel sem jólatré. (GB)

10.janúar 2008

Grisjunarþörf

Víða má sjá eldri skógarreiti þar sem ástandið er svipað og sjá má í þessum skógarteig. Kolniðamyrkur, gróðurlaus skógarbotn og greni- eða furutré standa með tæplega 1m millibili. Græn króna trjánna orðin lítil og skógurinn ógreið- eða illfær gangandi fólki.

Þessir skógarteigar eru víti til varnaðar um nauðsyn þess að grípa tímanlega í taumana varðandi grisjun. (GB)

19 desember 2007

Ráðstefna NSFP í Finnlandi

Eins og áður hefur komið fram sótti hluti starfsmanna NLS ráðstefnu í Finnlandi nú í haust. Tekin hefur verið saman skýrsla um ráðstefnuna. Hana er hægt að nálgast hér sem PDF-skjal.(7Mb)(GB)

28.nóvember 2007

Sniðugur bekkur

Nauðsynlegt er að geta hvílt lúin bein öðru hvoru í gönguferðum um skóga. Er þá sérlega skemmtilegt að hafa bekki líkt og þennan til að tylla sér á.

Í Engihlíð skammt frá Hofsósi hefur Oddný Angantýsdóttir stundað skógrækt frá upphafi Norðurlandsskóga. Í ferð starfsmanna landshlutaverkefnanna í september síðastliðnum var hún heimsótt og skógræktin skoðuð. Bar þar margt áhugavert fyrir augu og m.a. þennan skemmtilega bekk.(GB)

13.nóvember 2007

Grisjun á Dagverðareyri

17.október 2007

Melatíglar

Oft er talað um hættu á frostlyftingu plantna í ógrónu landi og má víða sjá ef grannt er skoðað ummerki um slíkt á landinu sjálfu. Ekki þarf þó að skoða mjög náið land eins og sést á myndinni til að sjá að hér er frosthreyfing í jarðvegi mikil. Bráðnauðsynlegt er að koma einhverri gróðurþekju á slík svæði áður en plantað er.(GB)

M-Planter (kvikmynd)

10.október 2007

Finnsk gróðursetningarvél

Á ráðstefnu í Finnlandi í byrjun september var þátttakendum sýnt ýmislegt það sem er að gerast í finnskri skógrækt. Eitt af því er aukin vélvæðing í gróðursetningu. Þessi vél bæði jarðvinnur og plantar og er með tvöfaldan haus þannig að hún getur plantað tveim plöntum í einu. Finnskt verktakafyrirtæki vinnur að þróun og smíði þessa gróðursetningarhauss sem festur er á gröfu sem ekki er af minni gerðinni. Heldur finnst manni þetta nú stórkarlaleg vinnubrögð! Ástæður þess að áhugi í Finnlandi er fyrir slíkum vélum, er fyrirsjáanlegur vinnuaflsskortur, erfitt sé að fá gott fólk í gróðursetningu.

. Sérlega áhugasamir geta smellt á hlekkinn hér fyrir neðan og náð í stutta kvikmynd sem sýnir vélina í vinnslu. ATH myndin er rúm 15Mb og best að hafa þokkalega tengingu til að ná að hlaða henni niður.(GB)

4.október 2007

Fyrr og nú - 2005 og 2007!

Skjólbeltarækt hefur verið stunduð á nokkrum bæjum í Þistilfirði frá stofnun Norðurlandsskóga. Í Garði voru fyrstu skjólbeltin gróðursett vorið 2000. Efri myndin er tekin af því belti vorið 2005 og sú neðri nú haustið 2007. Sjá má að skjólbeltið hefur vaxið ágætlega og er farið að veita töluvert skjól.(GB)

20.september 2007

Fyrr og nú - 2003 og 2007!

Í byrjun vikunnar voru starfsmenn landshlutabundnu skógræktarverkefnanna á árlegu landsmóti. Var þá meðal annars farið í Brennigerði í Skagafirði til heiðurshjónanna Álfs og Margrétar. Þar var margt að skoða og þar var farið í þennan sitkabastarðsreit. Efri myndin er tekin í september 2003, en sú neðri nú í haust, fjórum árum síðar. Sést hve gríðargóðum árangri skógarbændur í Brennigerði hafa náð, enda leggja þau mikinn metnað í skógræktina og sinna henni af alúð. Munu vera 8-9 ár síðan sitkabastarðurinn var gróðursettur. (GB)

15.ágúst 2007

Fjalldrapi

Fjalldrapi (Betula nana) er lágvaxinnl runni af bjarkarætt og er algengur í mólendi hér á norðurlandi, hann vex annars um mest allt landið nema austan til á Suðurlandi. Hæsti fundarstaður hans er í Bleiksmýrardal inn af Fnjóskadal þar sem hann vex í 850m hæð. Fjalldrapinn myndar kynblending með birkinu og nefnist sá blendingur skógarviðarbróðir. Haustlitir fjalldrapa eru rauðir en hreins birkis gulir og má því oft greina hvort birki sé blandað fjalldrapa með því að skoða haustliti þess. Fjalldrapi er yfirleitt til trafala í skógrækt þar sem hann veitir smáplöntum mikla samkeppni og er því nauðsynlegt að jarðvinna land þar sem fjalldrapi vex í þéttum breiðum. (GB)

5.júlí 2007

Slóðagerð

28.júní 2007

Dularfullar trjáskemmdir

Hér eru myndir af dauðu lerkitré sem Guðmundur Helgi Gunnarsson fann í skóginum sínum á Skjaldarstöðum í Eyjafirði. Svo virðist sem greinin sé nöguð, hugsanlega af mús. Á svæðinu voru fleiri stök tré með sömu einkenni. Forvitnilegt væri að vita hvort fleiri skógræktendur hafi orðið varir við eitthvað svipað. (BS)

20. júní 2007

Lautarferðir í skógi

12. júní 2007

Blæöspin á Grund

Grundarreitur í Eyjafirði er einn elsti gróðursetti skógarreitur á Íslandi. Þar var m.a. gróðursett blæösp árin 1900 og 1901 en það var áður en fyrsta íslenska blæöspin fannst í Garði í Fnjóskadal. Á þessum árstíma sést greinilega að það erum a.m.k. tvö kvæmi af Blæösp í Grundarreit, eins og sést á myndinni er áberandi rauður litur á hluta blæasparinnar en hinn hlutinn fagurgrænn.(VJ.)

6. júní 2007

Áburðargjöf á nýgróðursetningar

Í upphafi gróðursetningartíma er ekki úr vegi að minna á vandvirkni við gróðursetningu og áburðargjöf. Rausnarskapur er ekki alltaf viðeigandi eins og sjá má á þessari mynd. Við áburðargjöf þarf að passa upp á að "vera ekki of góður" og halda áburðarskammtinum við viðmiðunarmagnið 12-15gr (1msk) og best er að nota til þess gerðar mæliskeiðar sem afhentar voru á dreifingarstöðvum fyrir nokkru, og eru jafnvel enn til þar. Passa upp á að láta dreifa áburðinum aðeins frá plöntunni og alls ekki í haug við stofninn.

(mynd:GB)

15.maí 2007

Skógarfura er tegund sem mikið var gróðursett á Íslandi á sjötta og sjöunda áratugnum. Furulúsin gekk hins vegar nokkurnvegin frá allri skógarfuru á Íslandi dauðri, þar sem náttúrulegur óvinur furulúsarinnar, maríuhænan var ekki til staðar í nægjanlegu magni í íslensku vistkerfi.
Það er þó trú margra að til séu kvæmi af skógarfuru sem henta muni íslenskum aðstæðum. Sumarið 2004 voru gróðursettar kvæmatilraunir af skógarfuru á nokkrum stöðum á Íslandi þ.á.m. á tveim stöðum á Norðurlandi. Gróðursett voru 25 kvæmi, aðallega frá Noregi og Finnlandi. Í fyrrasumar var síðan bætt við þremur kvæmum af afkomendum skógarfura sem lifðu af furulúsina á Íslandi. Komið hefur í ljós að lifun í þessari tilraun er á bilinu 60-70% sem þykir harla gott í kvæmatilraun.
Framtíðin á síðan eftir að leiða í ljós hvernig þessum kvæmum reiðir af.

(Mynd: VJ)

26. apríl 2007

Næfurbjörk

Næfurbjörk (betula papyrifera) er algeng tegund í Norður-Ameríku og er sú sem hefur stærsta útbreiðslusvæðið þar. Norðurjaðar útbreiðslusvæðisins fylgir skógarmörkunum.

Ekki er mikið af henni hér á landi og hefur hún ekki mikið verð reynd. Þó er eitthvað til af henni í Kjarnaskógi, en ekki hefur hún reynst standa sig sérlega vel. Í sínum náttúrulegu heimkynnum nær hún yfirleitt 20m hæð en hæst getur hún orðið um 35m. Þetta er frekar skammlíf tegund, er fullvaxin 60-70 ára og verður sjaldan eldri 140 ára

Myndin er tekin í ferð Skógræktarfélags Íslands til Alaska í september 2006

(Mynd: VJ)

4.apríl 2007

Balsamþinur

Balsamþinur (abiea balsamea) er ekki mjög algengt tré í skógum á Íslandi. Í heimkynnum sínum verður það 15-23m á hæð. Náttúruleg útbreiðsla tegundarinnar er eins og sést á kortinu:

Balsamþinurinn sem myndin er af er í Vaglaskógi og Sigurlaug Rúnarsdóttir er hæðarviðmið!

Nánari upplýsingar er hægt að fá á vef Lystigarðs Akureyrar.

(mynd: VJ)

21.mars 2007

Á þessari mynd má sjá birkiskóg sem hefur frábært tækifæri til að breiðast út af sjálfsdáðum í landið umhverfis. Við friðun myndu fræplöntur hafa góða möguleika til að ná fótfestu í melum og hálfgrónu landi.

(mynd: VJ)

13.mars 2007

Sérstök ummerki á rekavið

Töluverður reki hefur verið við Íslandsstrendur, þó dregið hafi úr honum á síðustu árum/áratugum. Er víst því um að kenna að skógarhöggsmenn eru mikið til hættir að fleyta timbrinu niður stórárnar t.d. í Síberíu og farnir að nota aðra tækni. Við fleytinguna misstu þeir alltaf eitthvað frá sér sem svo endaði á Íslandsströndum sem rekaviður.

Þessi stofn er í rekaviðarsafni þingeyskra skógarbænda og ber með sér nokkuð sérstaka sögu. Sjá má sérkennileg "strik" á bolnum eins og sést vel á myndinni. Þetta mnu vera ummerki um harpix- eða viðarkvoðu- aftöppun. Hún fór þannig fram að rist var skáhalt V niður í móti og síðan rekin einskonar trekt í stofninn þar fyrir neðan. Fötu eða öðru íláti var svo komið fyrir á trektinni til að taka við kvoðunni. Þetta hefur greinilega verið gert endurtekið á þessu tré.

(mynd: GB)

6.mars 2007

Skógur við Hóla

Þessi fallegi blandskógur við Hóla í Hjaltadal samanstendur af stafafuru, blágreni og einstaka birkitré. Í skóginum er tjaldstæði sem skipt er upp í einingar eða misstór skógarrjóður. Einnig er þar skemmtilegt stígakerfi. Nánari upplýsingar er að finna á vef ferðaþjónustunnar á Hólum.

(mynd: BS)

14.febrúar 2007

Á fyrsta starfsári Norðurlandsskóga árið 2000, var töluvert átak gert í ræktun skjólbelta. Meðal annars var gróðursett í þetta 5 raða skjólbelti við Staðarhól í Aðaldal. Efri myndin er tekin haustið 2000 en sú neðri haustið 2006. Ekki er alveg nákvæmlega sama sjónarhornið á myndunum en þó er hægt að sjá hvílíkum stakkaskiptum landið hefur tekið. Þurrkur hefur þó háð beltinu nokkuð.

Á Staðarhóli er rekið gistiheimili og var beltið gróðursett til að skýla smáhýsum og fegra umhverfi þeirra. Á Staðarhóli er einnig skeytastöð Veðurstofunnar og eru þar oft sett bæði hita- og kuldamet.

(myndir: GB)

30.janúar 2007

Landgræðsluskógur á Ássandi

Ássandur í Kelduhverfi er stórt mela- og sandsvæði vestan Jökulsár á Fjöllum. Þar hefur verið friðað landgræðslusvæði frá 1942 og er innan girðingar 2213ha. Landgræðsluskógasvæði er einnig á Ássandi og frá um 1990 hafa starfsmenn Landgræðslunnar í samstarfi við Skógræktarfélag N-Þingeyinga plantað ýmsum trjátegundum norðan og norðaustan verslunarinnar í Ásbyrgi. Sjá nánar á vef Landgræðslunnar: Ássandur

Árið 2005 var þar plantað 25.000 birkiplöntum skv. skog.is. (mynd: GB)

22.janúar 2007

Línur í landslagi

Haustlitir í skógi. Hvernig við gróðursetjum og blöndum tegundum ræður útliti skógarins næstu áratugi. "Eitt mest krefjandi verkefni í skógrækt hér á landi er að fella nýjan manngerðan skóg að landslagi. Það sem gerir þetta verkefni erfitt en um leið skemmtilegt er að engin hönnun er sú eina rétta og skoðanir eru afar mismunandi um hvernig fallegur, vel heppnaður skógur lítur út." Segir í Skógarbók Grænni skóga. (mynd BS)